ජනතාවගේ සෞඛ්‍ය ආරක්ෂාව වෙනුවෙන් දඹුල්ල ආර්ථික මධ්‍යස්ථානය නැවත දැනුම් දෙනතුරු වසා දැමෙයි

ගොවි ජනතාවගේ, ව්‍යාපාරිකයන්ගේ මෙන්ම රටේම ජනතාවගේ සෞඛ්‍ය ආරක්ෂාව වෙනුවෙන් දඹුල්ල විශේෂිත ආර්ථික මධ්‍යස්ථානය නැවත දැනුම් දෙනතුරු වසා තැබීමට තීරණය කළ බව දඹුල්ල ආර්ථික මධ්‍යස්ථාන වෙළෙඳ සංගමයේ සභාපති ඡන්න ඇරෑවුල අද (07) පවසා සිටියා.

රටේ පවතින තත්ත්වය පිළිබඳව ආර්ථික මධ්‍යස්ථානයට පැමිණෙන විශාල ජනතාව සෞඛ්‍ය පුරුදු අනුගමනය නොකිරීම හේතුවෙන් සහ මෙම වෛරස් තත්ත්වය පැතිර යෑමේ දැඩි අවදානම පිළිබඳව ජනාධිපති කාර්ය සාධක බලකායේ විශේෂ නියෝජිත බැසිල් රාජපක්ෂ සහ රාජ්‍ය පරිපාලන හා ස්වදේශ කටයුතු පළාත් සභා හා පළාත් පාලන අමාත්‍ය ජනක බණ්ඩාර තෙන්නකෝන් සමඟ වෙළෙඳ සංගමය දීර්ඝ වශයෙන් සාකච්ඡා කොට මෙම තීරණයට එළඹි බවයි ඔහු වදිදුරටත් සඳහන් කර සිටියේ.

දඹුල්ල ආර්ථික මධ්‍යස්ථානය පසුගිය දින තුනේ සිට වසා දමා තිබුණු අතර එය හෙට දින නැවත විවෘත කිරීමට නියමිතව තිබුණා. කෙසේ වෙතත් ඇදිරි නීතිය ලිහිල් වූ අවස්ථාවේ ජනතාවගේ හැසිරීම සහ වෙනත් ආර්ථික මධ්‍යස්ථාන වල ජනතාව හැසිරුණු ආකාරය පිළිබඳවයි දීර්ඝ වශයෙන් සාකච්ඡා කොට ගොවීන්ගේ ව්‍යාපාරිකයන්ගේ මෙන්ම ජනතාවගේ ආරක්ෂාව ගැන හිතා මෙම තීරණයට එළඹි බව ඔහු සඳහන් කර සිටියා.

ආර්ථික මධ්‍යස්ථානයට එළවළු සපයන ගොවීන්ගේ නිෂ්පාදන මධ්‍යස්ථාන ව්‍යාපාරිකයින් හරහා මිලදී ගෙන ඒවා දිවයින පුරා විසිරී සිටින ප්‍රාදේශීය ලේකම් කාර්යාල හරහා බෙදා හැරීමේ නව වැඩපිළිවෙළක් ක්‍රියාත්මක කොට ඇති බවද හෙතෙම සඳහන් කළේ.

ඒ අනුව විශාල වශයෙන් ජනතාව එක්රැස් නොවී ගොවි නිෂ්පාදන පාරිභෝගික ජනතාව අතරට පත් කිරීම සඳහා අවශ්‍ය පියවර මේ වන විටත් ගනිමින් තිබුණ බවද සභාපතිවරයා වැඩිදුරටත් සඳහන් කර සිටියා.

1Shares

Leave a Reply

Your email address will not be published. Required fields are marked *