ප්‍රදේශ රැසකට පස්වරුවේත් තද වැසි – කළු, කැලණි සහ ගිං ගංගාවල ජල මට්ටම් ඉහළට

නුවරඑළිය දිස්ත්‍රික්කයේ අඹගමුව, කොත්මලේ සහ නුවරඑළිය ප්‍රාදේශීය ලේකම් කොට්ඨාසවලට නායයාම් පිළිබද අවදානම් නිවේදනයක් නිකුත් කර තිබෙනවා.

ජාතික ගොඩනැගිලි පර්යේෂණ සංවිධානය පැවසුවේ අදාළ ප්‍රදේශවලට ගත වූ පැය 24 තුළ අධික වර්ෂාවක් ලැබී ඇති බැවින් ඉදිරි කාල සීමාව තුළද වැසි ඇතිවුවහොත් නායයාම් ඇතිවිය හැකි බවයි. එබැවින් නායයාමේ ලක්ෂණ පවතින්නේ නම් අදාළ ප්‍රදේශවලින් ඉවත් වන ලෙසයි ජාතික ගොඩනැගිලි පර්යේෂණ සංවිධානය ජනතාවට දැනුම් දෙන්නේ.

මේ අතර දිවයිනේ බොහෝ ප්‍රදේශවලට ඉදිරි පැය 24 තුළ ද වැසි ඇති විය හැකි බව කාලගුණ විද්‍යා දෙපාර්තමේන්තුව පැවසුවා. මධ්‍යම සහ සබරගමුව පළාත්වලත්, ගාල්ල සහ කළුතර දිස්ත්‍රික්කවලත් ඇතැම් ස්ථානවලට මිලි මීටර් සියයට වැඩි තද වැසි ඇති විය හැකි බවයි එම දෙපාර්තමේන්තුව සදහන් කළේ.

වයඹ පළාතේත්, කොළඹ, ගම්පහ, මාතර සහ හම්බන්තොට දිස්ත්‍රික්කවලත් ඇතැම් ස්ථානවලට මිලිමීටර් 75ක පමණ තරමක තද වැසි ඇති විය හැකි බවද ඉදිරි පැය 24 සදහා අද පස්වරුවේ නිකුත් කෙරුණු කාලගුණ අනාවැකියේ සදහන්.

තවද ඇද හැලෙන වර්ෂාවත් සමග කළු ගගේ සහ ගිං ගගේ ජල මට්ටම් ඉහළ ගොස් තිබෙනවා.

වාරිමාර්ග දෙපාර්තමේන්තුව පැවසුවේ පවතින වර්ෂාපතනය හේතුවෙන් කළු ගගේ ජල මට්ටම රත්නපුර ප්‍රදේශයෙන් විමසිලිමත් විය යුතු මට්ටමට පැමිණ ඇති බවයි.

ගිං ගගේ ජල මට්ටම ද තවලම ප්‍රදේශයෙන් විමසිලිමත් විය යුතු මට්ටම දක්වා ඉහළ ගොස් ඇති බව වාරිමාර්ග දෙපාර්තමේන්තුව අද පස්වරුවේ නිකුත් කළ නිවේදනයක සදහන්.

කැලණි ගගේ ජල මට්ටම ද දැරණියගල සහ කිතුල්ගල ප්‍රදේශවලින් ඉහළ ගොස් ඇති බව එම නිවේදනයේ දැක්වෙනවා.

2Shares

Leave a Reply

Your email address will not be published. Required fields are marked *